ISUKRST ČUVA MARININU PAZINSKU MALVAZIJU

 

　

　

　

Jedna pazinska familja, ma govoridu 'judi da i ni, da i nisu pazinski, već tamo neki dalmatinsko-zagorski, ili već, či ni, e, eto ti i takovi, imali sina Ivulu, ali Ivula manjamukt. Otac i mater ubijali se od lavura po polju. Teke vina, ka litra ulja, ništo verdure, ka peča mriž... i tako nikako prolazilo se kroz život. Kurile godine. Roditelji ostarili. Jedno za drugim partili put čimatorija. Ostal sin Ivula, sada brez idi ikega, a nenaušni lavurati. Dok je imal ča u kući i konobi za prodati, proda, na koncu konca, ništa više ni ostalo... Ča se tiče spize, vajik bi mu, kukavcu čemernome da bil kukavcu, niko ništo da, da od gladi ne skapa... ma falilo mu za napit se...

Jedon put, dobije Ivula, od jednog ribara, po kila srdejav. Dođe doma, ispeče ih i pojide, ma sad bi tribalo zaliti barenko s' jednim žmulom dobre domače Pazinske malvazije... Ako bi čagod i dobija za pojisti, za popiti mu niko nije ništa dava... ča' če sad kad nima više ništa za prodaju? Jedina stvar ča je priostala, bilo je jedno raspeče od gojza, ča je visilo na zidu. Vazme on to raspeče, i ode do Marine, jedne žene ka je puno išla u crikvu, a imala je i puno vina, prvoklasne Pazinske malvazije...

-Marina, Mare, ti šigurno nemaš vako raspeče u kući?

-Bog s' tobon kako ne bi imala. Jedno mi visi di spavan, a drugo u kužini...

-A u konobi? Imaš li raspeče u konobi?

-Ajme meni neman. Kako nisan mislila na to?

-Evo ja iman jedno baš za konobu, da ti čuva tvoju... na dobru glasu, malvaziju Pazinsku... našu malvažiju...

-Daj ga 'vamo, vazeščuga, ka mu je cina?

-Pet litra vina. Pazinske malvazije, a ma tvoje, drugo njanci neču ni štapon tači...

-Pet litra, moje Pazinske malvazije? Da nisi poludija, oli si šempjo poša na kvasinu...? A vidi kako je ružinavo raspeče... Nisan luda... Nisan stupido... da ti dan pet litra moje Pazinske malvazije za ovu vodi, vakardece ružinu Isukrstovu... pet litra ovega tekučega kruva... ove zlatne kapi... ve likarije...

-Dobro, de četiri.

-Ma ni govora!

-Tri?

-Ma nanka čuti...

-Dvi?

-Ne 'dan niti dvi...

-More li barenko jedan liter?

-Dobro daču ti, ma teške duše, tu jednu litru, kada si tako začkomio, vrag ti sriču izio...

Ča je tu je, bolje išta vego ništa...

Vazme on tu litru i popije u tren, s' nogu nage naiskap, dobro pazeč da se što ne prolije, jerbo se te mrve ne kupe...

Marina obisi raspeče na jednu brokvu na zidu, a ispod je bila jedna demejana od dva'eset litara puna vina.

U neko vrime pođe Mare do konobe, samo što otvori od konobe vrata, od konobe zaposjednu je, jaka, nestvarna, nadnaravna, zasljepljujuča svjetlost, prije li odsjaj ognja paklena... koja je podiže od zemlje, da je ispod nje mogao protrčati, omanji, osrednji čovjek, ili oveće dite... i baci je unazad... strah je ka trnci obuze od nožnih prstiju ka gore... ka slipa poče pipati oko sebe, ne snalazeći se najboje... zaglušena, gluhim, hladnim i dalekim zvukom koji ka da dopire iz utrobe zemje... progleda povučenoga pogleda ka brokvi na zidu, one brokve o kojoj je visilo raspeče, a koja se ka vida, bešumno i polako odvidavala sama od sebe... raspeče pade odvidano na demejanu... Demejana ka carcik puče... Isteče vino po konobi, ali ne do kraja... ostalo je unutra još oko jedne litre i uspravan Isukrst, koji se nije da pomiriti, uravniti doli...

　

　

　

　

Nikola Šimić Tonin