NEKAD SE SVE BOJE ZNALO
(kad zapuše južina)
Nekad se znalo
oće li stara Verka dočekat zimu
i kako se zovu dica u mistu
i čiji su i u koju skulu gredu.
Po zvuku se znalo koji brod intraje u porat
i oli je nočas bilo ribe.
I kome zvona tuku kad im ni ura.

Znalo se kad će furešti arivat
i kome lipa Kate darži otvorenu ponistru.
Znalo se da Jure neće vratit vriče od lavande
i ko će mu ih jopet ponovo dat.

Znalo se u koga su najdebje guzice
i koja dica ne liče na očeve.
Bilo je dovojno prostrit neku veštu
i usput vidit ča se u suside kuva.

A nije ni mirakul sve znat
kad su sve ponistre u varoši gledadu
jedna u drugu.Čak je i čoravi Stipe zna
po svačemu čije su mudante na konopcu.
Po škurama se znalo koji vitar puše
i oće li stat, ili će polako fermavat.

Niko nije imao leroj, a svi su znali koliko je uri.
U poju pogledaš u Sunce i znaš da je dosta za danas.
Vapor je pristaja usrid mista i svi su ga čekali,
ka da je fjesta. Znalo se kad će arivat Dinko i Anica
sa onom smišnon dicon. Pa će se puni borši i kufera,
popet uz Jadransku kod svojih - treća vrata desno.

A dica ko dica - odma će tit na kupanje.
Sve se to znalo jer se uvik ponavjalo.
Uveće bi se dugo ostalo uz ribu i bičerine
uz smih i radost ča su opet svi zajedno.

A tribalo je isplanirat kad će se kaić piturat,
treba li zakrpit mriže, ča ima u poju,
oče li bit grozdja, ima li ribe i di su dobre pošte,
ko je od prošle zime umra, a ko je skoro krepa?
Lita su onda bila duga, a opet kratka ča se sve tilo.
E nekad se skoro sve znalo
i da se vaja ustat kad pasa Tonko sa mazgon
i ča će reč kad laste nisko letidu
i da sutra neće bit kruva.
I da su požari sa druge bande Hvara
i da je Jelsa na dvi ure hoda.

A znalo se di se gola kupa lipa Švabica
i zoč se baš tu stalno čuvaju maslinjaci -
biće da ih poskoci ne odnesedu.
Nekoliko godišća pri iz Australije se torna
barba Džoni, oli ti moj stric Ivo.

E on je gušta parlat kakovi su mirakuli tamo,
kako su sloni ka opčina, a zmije duže od rive.
I dica su znala da laže, ali on je tako lipo laga.
Jedino se nije znalo za koliko će slagat.

A vrime je curilo, curilo ka tanki mlaz
mirisne lavande iz lambika.
I ka da je odjednon iscurilo.
Davno nema Dinka i Anice ni njihove smišne dice.
Zapravo osta san samo ja.
Više nisan ni dite, ni čovik, ni starac.
Ovdi iza sedan gora, di ni važno ča puše,
kad počimje jematva i oće li masline rodit.
Ovdi di so ne štipje za oči, ovdi di vali ne tuku.
I sve ča je u kamari da bi za kašetu gavuni,
tek istresenih iz punih mriž.

Nisan gladan - samo da povonjan friškinu.

E nekad se sve boje znalo,
znalo se da tilo ne kuca bez sarca
i kome zvona tuku kad im ni ura.

Kotoraš Pepi