Usrid đardina dimi se dim. Puže uz kampanel ka koča po moru. Sav konkulan, ka lešo manistra, stoji Frane. I gleda. Je mu niki mot tako se stavit uza zida. Dricaj se Frane, dricaj! Briga Franu za tuđe riči. Dim mu je lipši. Priđe mu bliže. Ajme ča vonja, ka da se pinjol prži. Mižeriji sve lipo vonja. Kruli Frani usrid štumka, zato i govori na vas glas. Da niko ne čuje. Da mu je baranko šaku mendula ol koja suva smokva. A! Otkad je umrla Ane, Frani se ne kuva. Al još se sića vonja gulaša s kunpirin. Nasloni glavu na zid kanpanela i zaklopi oči. Da mi je pirja pa nalit par boca ovega za sutra, konta Frane. Vatra se lagano trne. Ajde Frane kući! Prene ga susid Šime. Pušti ti mene, gledaj svoja posla, lipi te vrag odnija. Moga san još malo guštat. Počeše se Frane iza livog uva i ode put porta. Vonjat more. Sija je na rivu i spuštija noge. Naslonija kosti na kamariš. Sklopi oči i jope otputuje u vrime svoje Ane. Svega je bilo, i brančuleta i rečini. I sriće je bilo. Jel ti lipo gori Ane? Je, znan, samo pitan da ništo kažen. Ti poznaš Boga, a ko pozna Boga naša je prijatelja iznad sviju. Čuja san don Ivu to reći, pa ponavjan, da nikad ne zaboravin. Sviraju li ti anđeli Ane? Sviraju, i ja ji čujen. A sad bi dobro doša bokunić kruva, pa ga točnit u kapju maslinova uja ... privrče Frane misli ka krunicu. Sunce takaje more. Lipo je.