Peciklin za Gabrijela

     Gabrijel je z nojži zvlekel soni. Pred hižom je napravil brega od snega i unda čekal pajdoše da započnejo spust. Za šestgodišnjake nega lepše igre od igri na sniegu. Tu ponorejo do kraja. Mokri, zmržjeni, glodni – no, ne odustaju. Vrieme je letelo kak da ima krila. Odzvonilo je pozdravljenje.  Mama je došla vun i pozvola Gabrijela nutri f hižo.

       Gabrijel je saki večer z mamom molil. Potli molitve ga je una kušnola, pokrila z tuhicom, zgosila svetlo i zišla vun. Jen je večer primetila pod vroti Gabrijelove hiže da se nutri vužgalo svetlo. Postiha je otškrinola vrota i vidla da Gabrijel sedi na postelki. Roke so sklopljene, a un šepče svojo molitvo.

̶  Zakaj ne spiš?  ̶  pita mama.

̶  Zoto kaj se molim.

̶  Pak smo malo pre skup molili.

̶  Je, molili smo za zdrovje, za oprost grehof, zafolili se za primljene dore. A jo imam  jeno molbo. Isoseka prosim da mi za Božić pod krispan donese peciklina. Plovoga. Z dve brzine.

̶  Un pod krispan ne nosi tak velke dore. Dojde postiha f božičnoj noči tam de se svieti i de so dobra deca. Božič je god f kojem slavimo Isosovo rođeje. A uno je bilo skromno, f neimaštini, v opasnom vremeno. Isos se rodil f štalici, ležal na pikečoj slami, drftal od zime. Da bi si meli takve želje kak ti ve imaš, poništili bi so ljepoto božične noči. 

     Gabrijel ni odustal. Svojo je molitvo šeptal dale se do Badnjaka. Na božični novečer je z mamom i babicom kinčal krispana. Babica je pritom popevala božične pesme i v zloto zamotala orehe. Ne dola dotrči tradicijo. Dedek je sedel kraj šparheta i pomali natakal f kriglin. Pre toga je svetom vodom poškropil cielo dvorišče i so živino. A unda i hižo i se koji vuji živijo.

 ̶  Dojdi sim, Gabrijel. Očeš ti som složiti jaslice?  ̶  pitala je mama.

̶  Misliš f serco il zapraf? Kak god, očem. Daj mi Jožefa i Marijo. Uni naj klečijo kraj maloga Isosa… Mama i tata morajo biti blizo svega deteta. Zvezdo Repačo bom obesil na kroh štalice. Pastere i ovčice bom poredal koli štalice, a voleke bom del nutri. Uni naj dihajo kaj bo deteto toplo. Još mi treba velko svetlo koje se zvuna dobro vidi.      

       Babica je pod stolnjakom složila križa od zrnja žita i dela pušlek slame. Na stol je donesla hlebčeca domočega kruha kak znaka imaštine. Dela je i zdelico z niknotom fajn zelenom pšenicom, znamenjem novoga života i nade. Fkrog je zvezala trobojnico, nek se zno da je domoljublje f hiži. Na sredino je zapičila sviečo. Kuglice so se njihale na krispano skup z lančeki od krep-papiera, licitarskim sercima i črlenim čizmicami. Da se ne dotrgne negdašnji običaj kinčanja. Krispan je dost velki kaj na njega vlezne starinski i moderni kinč. I hiža je dost velka. V njoj moreju živeti tri generocije, ak neso hmoje.

       Gabrijel je bil vidno srečen. Verval je da mo bo Isosek spunil željo. Dok so skinčali krispana i se posložili kaj bo Badnjak provi božični novečer, dedek je zaoril svojim ljiepim baritonom  ̶  Sim na zemli mir veselje… Mama se priključila z drhtečim sopranom. Gabrijel ni mogel skriti veselje.

  ̶  Zakaj je samo jempot na leto Božič?  ̶  pital je glasno, a okece so se kresile. Tak pun iščekivanja, obzanil je svega plana.

̶  Na Božič vjutro bomo zojtrekovali dok tata dojde dimo i dok nam se stric pridruži svojom familijom. Potli  bomo odmotali dore. Moj bo najvekši. Babica veli da so forbe  Božića: črlena kak ljubaf, zelena kak nicanje novoga života i zlotna koja predstovlja  milost Božjo. Moj bo dor zamotan f črleno!  Mašlek bo zlotni!

       Mama je odišla na polnočko, a Gabrijel se to večer zodnjipot pomolil za peciklina. Na Božić vjutro je najpre odišel f boravak. Kraj krispana je bil peciklin. Od sreče mo je zabegnolo dihaje. Ni mogel govoriti. Došel je ksej dok je tata otprl vrota.

̶  Viš, Isosek mi je donesel peciklina! Plovoga. Z dve brzine. Moja je mama furt tvrdila da se to na dogodilo. Neje znola kakve smo dogovore mi dvo meli … Ve bom do drugoga Božiča moral biti dober. I sako nedeljo moram iti k meši. I na vjeronaok. Posluhnoti se. Uh, to bo treba zdržati! Dok pem f štacun, nam smel varati da mi je trgofka svojevoljno med kupljeno dela čokolodo, smokiče i žvakače. I transformera.

 ̶  Pak si ne to se obečal? – pital je tata.

 ̶  Jesam. Nesam štel raskerati. Ponodil sam se kaj sam mislil da je njemo važno. I neje mi žal. Imam peciklina. Plovoga. Z dve brzine i štopsvetlom… Štopsvetlo je ober unoga kaj sam prosil.

        Mama je postovila stola i se pozvola na zojtrek. Gabrijel ni došel. Si so ftek jeli, spominali se, mobiteli so piščali, čestitke se redale.

 ̶  Idi po maloga. Na gloden na Božić. – rekel je tata.

Gabrijela ni bilo v boravko. Niti peciklina. Bormeš niti Isoseka f štalici pod krispanom. Mama je zbežala vun. Gabrijel je bil na drugom krojo vulice. Taman se obračal prema domo. Dojuril je i zabrenzal praf pred mamom.

̶  De si ti? Koga si pital jel smeš iti vun? Jel smeš zeti peciklina? I de je Isosek? – pitala je mama.

̶  Naj se mešati! Furt si krivo govorila. Ne znaš kakof sam dogovor mel žnjim. Obečal sam mu da bom njega prvoga prepelal čez cielo vulico. 

     Mama se zmerila. Gabrijela je prevlekla ksej, kušnola ga v zdene obraze. Božič je. Svetek rođenja i velkoga veselja. Sem treba oprostiti i se najlepše zaželeti.

 

                                                                                               Ankica Bistrović    

Priznanje za najbolji prozni rad na književnom natječaju

Vrelo nadahnuća, Ludbreg 2022.