PROČITANO

573

PUTA

OD 14.01.2018.

ZAPISANO VA SRCE

Rodni kraj spod Učke gore

Dole na rivijere je more dišelo i šumelo kako da va krile ziba lepu divojku koj su se zelena, jedra prsa dignula proti nebu i počivaju va ovin raju - tamo dugo Cres i Krk namiguju

Piše Nadija RUBEŠA, Slika Marin ANIČIĆ

javascript:openWindow('aspx/showimage.aspx?id=515606',1074,545,'');

Neki dan san bila na druženju s armonikun va Kastve.
    Ne rabi govorit kako j celi Kastav odzvanjal po polkah, valcereh i potresujkah. Saka pohvala Kastve i organizatorun.
    Ma ovo ne pišen zaradi armoniki, nego mi je onput neč drugo palo v oko.
    Kad smo se ponaslišali muziki, san se s kompanijun našla va jenin ristorante s kega se vidi celi Kvarner.

Vesela kumpanija
Armoniki su još vaveki odzvanjale, a ja gjedala proti Učke za kun se j sunce trudno i črjeno spravjalo na počinak. Modri oblaki su mu pustejicu načinjali da još lepče spi. Dole na rivijere je more dišelo i šumelo kako da va krile ziba lepu divojku koj su se zelena, jedra prsa dignula proti nebu i počivaju va ovin raju.
    Tamo dugo, va maglice beloj, Cres i Krk namiguju i igraju se skrivanca Suncun ko njin škurinun preti.
    Moja kumpanija je bila vesela i smešna, i vreme je brzo pasevalo.
    Saki put kad san spram Učki pogjedala, drugu sliku san videla. Drugačiju od one prve, sledić škureju.
    Pa je sunce zašlo i sobun zelo črjenu koperticu od oblaki s kun će se naćas pokrit.
    Modri kolor mora, zeleni kolor boški

Anjelići

Gjedajuć odonde su tu lepotu mi se j paralo da i sama negdere z anjeli letin, srca veselega, duši bogate, ćuteć mir i sreću ča se to moren zvat rodnin krajun spod Učke gore.

– se je počelo škuret. Krk i Cres, tamo dugo, već se nisu mogli videt. I oni su šli pomalo spat.
A, šoto, puli mora, sramežjivo su se počele važigat lampadinice. Najprvo one najjače ke svete po cestah. Za njimi su se javile one od hoteli i na kraje sve one druge, miće kućne svetlića.

Igrački i vile

More črno, Učka škura, nebo još črneje, a uz more kolajnica (puno njih je već to reklo za ovu našu lepu rivijeru, ma ni druge besedi ka bi boje pristala) od svetlići žuteh, narančasteh, modreh ke ti smešić na obraze i va srce narišu, aš su vesele kako iskrice ili mladi mačići ki se bez brige igraju i na veselje te vabe.
Pitan se : – Kako su se ti bogi igrali kad su na jeno mesto hitili toliko lepeh igrački i još pustili vesele vile da ih saki dan obučuju va Sunce i na večer spat s Mesecun spravjaju?"
Hvala njin za sveh ki vide lepotu ovega mesta i najdu mir va srce kad more zapjuska va nogi od Učke ka ih pomalo toća va njin.

--------------

Preuzeto iz - http://www.novilist.hr/

lp, boro

http://budan.blog.hr/

BRZI CHAT